Район салым һәм салым булмаган керемнәр буенча планны үтәгән

2018 елның беренче кварталында район бюджеты план буенча тиешле 25% урынына 16,8%ка гына үтәлгән. Планның «үтәлмәве» югарыдагы бюджетлардан адреслы инвестиция программасы үтәүгә бирелә торган акчаның кереп җитмәве белән аңлатыла. Бу акча исә, аның күләме район бюджетының 58%н тәшкил итә, эшләр күләме барлыкка килгәч кенә керәчәк.
Бюджетның икенче өлеше — салым һәм салым булмаган керемнәр – 97 млн сум тәшкил иткән, бу 2017 елның шушы чоры белән чагыштырганда 11 миллион сумга күбрәк. Квартал планын район 2 процентка арттырып үтәгән.
Бюджет чыгымнары 143 млн сум тәшкил иткән. Барлык акчаның 53%ы хезмәт хакын түләүгә киткән. Бюджет акчасының иң күбе гадәттәгечә мәгарифкә киткән — 55,2%, хәер, бу процент сизелерлек кимегән: үткән елларда 62% һәм аннан да күбрәк була торган иде әле. Әмма мәгарифкә киткән акча былтыргыга караганда барыбер 2 млн сумга күбрәк — барлыгы 78 млн сум.
Мәдәнияткә чыгымнарның 14%ы яисә 20 млн сум (+5 млн сум) туры килә. Районга салым һәм салым булмаган керем белән кергән 97 млн сум акчаның 3 млн сумы — федераль, 48 млн сумы – республика, 46 млн сумы урындагы бюджетка киткән. Бюджеттан тыш фондларга 4 млн сум акча кергән.
Барлык салым һәм салым булмаган керемнәрнең 82,5%ы физик шәхесләр табышына салымга туры килә. Беренче кварталда ул 38 млн сум яисә 4,5 млн сумга күбрәк (+13%) кергән. Нефть һәм газ чыгару идарәсе, «Таргин-Механосервис», «Белкамнефть» җәмгыятьләре, үзәк район дәваханәсе һәм «Раздолье» психо-неврология диспансерыннан физик шәхесләр табышына салым арткан.
Икенче урында гадиләштерелгән салым салу (УСН) системасы тора — 7,7%. Бу планга карата 87%ка күбрәк. УСНның артуы, салым хезмәте хезмәткәрләре билгеләвенчә, кайбер шәхси эшкуарларның һәм «Камводсервис» җәмгыятенең әлеге салым салу системасына күчүләре белән бәйле.
Аннары күләме буенча җир салымы бара — 2,1%, яисә 977 мең сум. План 9,8%ка үтәлгән. Җир салымы иң күбе «Башремстройсервис» предприятиесеннән, Саузбаш, Мүзәк авыл биләмәләреннән һәм «Башнефть» компаниясе подразделениеләреннән кергән.
Йөкләтелгән табышка бердәм салым 954 мең сум тәшкил иткән, яисә планга карата 12%ка азрак. Кимү «Альянс», «Агат» предприятиеләре, шәхси эшкуар Тимашев кебекләрдән акча аз керүе белән бәйле.
Калган салымнар күп түгел, мәсәлән, керемнәр рәтендә милеккә салым — 0,4%, оешмалар милкенә салым 1,4% тәшкил итә һәм башкалар. Районның биш предприятиесе банкрот дип игълан ителгән: «1 Май», «Надежда» хуҗалыклары, «Коммунальник», «Жилкомсервис», «Подворье» җәмгыятьләре.
Ә менә район милкеннән алынган табыш сизелеп арткан. Муниципаль милекне арендага бирүдән 18 млн табыш алынган яисә еллык план 32 процентка үтәлгән. Былтыр бу вакытка 15 млн сум гына булган. 21 млн сумлык милек сатылган яисә еллык план 35 процентка үтәлгән. Җир участокларын сатудан гына да бюджетка 3 млн сумга якын акча кергән.

Сезгә ошарга мөмкин...

Комментарий өстәргә

Ваш e-mail не будет опубликован. Обязательные поля помечены *