Утырышны район хакимияте башлыгы Рәзиф Гыйльмуллин алып барды

Краснокама районы буенча Эчке эшләр бүлеге начальнигы Денис Баклушин оператив-хезмәт эшчәнлеге һәм «2016-2020 еллар йомгаклары буенча җәмәгать хәвефсезлеген тәэмин итү» муниципаль программасын тормышка ашыру, шулай ук РФ Җинаять кодексының яңа положениеләре турында чыгыш ясады.

Аның сүзләре буенча, районда полиция көче белән халыкның хәвефсезлеген тәэмин итү буенча күп нәрсәләр эшләнә. Нефтекамада былтыр исерекләрне урнаштырыр өчен 25 урынга исәпләнгән реабилитация үзәге ачылды. Анда яшәү урынына карап тормыйча, барысын да, шулай ук Краснокама районыннан да кешеләрне урнаштырырга мөмкин. Бу айныткычларның юклыгын хәл итәргә ярдәм итә.
Үзәк район дәваханәсенең наркология бүлекчәсе мөдире Әмирҗан Галиев сүзләре буенча, быел шәһәрдә дә, районда да эчкечеләр һәм наркоманнарның саны кимегән. Тагын ул үзе җитәкләгән 42 урынлык бүлекчәдә тәүлек әйләнәсенә кабул итүләре һәм бүлекчә коллективының югары медицина ярдәме күрсәтергә әзер булуын белдерде.

РФ Җинаять кодексының алкоголь һәм спирт продукциясе әйләнешенә кагылышлы частенә кертелгән үзгәрешләргә килгәндә, 2017 елның августыннан юридик шәхес булмаган кешеләргә өйләреннән һәм кибеттән исерткеч эчемлекләр саткан өчен өч мең сумга кадәр штраф бирелүе, ә бу хәл кабатланган очракта, җинаять җаваплылыгы каралуын ачыклады.

Алда Яңа ел бәйрәмнәре. Денис Евгеньевич сүзләре буенча, 20 декабрьдән 10 гыйнварга кадәр полиция тулы әзерлек режимында эшли. Җәмәгать тәртибен саклауга өстәмә акча һәм көчләр: ирекле халык дружиналары, шәхси сак предприятиеләре җәлеп ителә. Кызганычка каршы, район үзәгеннән тыш, бер генә авыл биләмәсендә дә халык дружиналары төзелмәгән. Кешеләр күп җыелган урыннарга видеокамералар да куелмаган.

Рәзиф Мөхәммәтнур улы барлык авыл биләмәләрендә дә бәйрәм көннәрендә булса да ирекле халык дружиналары төзү, ә район үзәгенә һәм Куян авылына видеокүзәтү приборларын кую мәсьәләсен кичекмәстән хәл итү бурычын куйды.

Яшьләр эшләре буенча комитет рәисе, терроризмга каршы комиссия секретаре Евгений Бармов БРда 2013-2018 елларга һәм районда 2015-2018 елларга терроризм идеологиясенә каршы тору чаралар планын тормышка ашыру йомгаклары турында чыгыш ясады. Аның сүзләре буенча, бу план тулысынча үтәлгән. Районда җинаятьчелек кимегән, яшьләр спортка җәлеп ителгән. Республика комиссиясе квартал саен районнар эшчәнлегенә мониторинг үткәрә, һәм безнең эш уңай бәяләнә.

Яңа Бура авыл биләмәсе башлыгы Рәсим Сәйфетдиаров составында наркотик булган кыргый үсемлекләр үскән урыннарны ачыклау һәм юкка чыгару, аларның законсыз үсүенә юл куймау тәҗрибәсе белән уртаклашты. Май аенда Яңа Бурада гражданнар җыелышы булды. Анда халыкка кыргый киндераш белән ничек көрәшергә кирәклеге аңлатылды. Өмәләрне ике этапта — 1 августка кадәр һәм 1 августтан соң үткәрү дә яхшы нәтиҗәләр бирә. Быел 1360 квадрат метр территориядән 680 килограмм киндераш юкка чыгарылган.

Район хакимиятенең муниципаль хезмәт һәм кадрлар эше буенча бүлек начальнигы Татьяна Әдиятуллина утырышта катнашучыларны коррупциягә каршы тору максатыннан муниципаль хезмәткәрләр өчен этика нормалары белән таныштырды.

Нефтекама, Агыйдел шәһәрләре һәм Краснокама районы буенча хәрби комиссариат бүлеге начальнигы ярдәмчесе Альбина Галиева 2017 елга көзге чакырылыш йомгаклары белән таныштырды. Краснокама районы буенча хәрби хезмәткә чакыру 88%ка үтәлгән. 5 кеше чакыру буенча хәрби комиссариатка килмәгән. Бер егетне республика комиссиясе кире борып кайтарган.

Район хакимияте башлыгы хәрби комиссариатның хәрби хезмәткә чакыру чорындагы эшенә канәгатьсезлек белдерде. Рәзиф Мөхәммәтнурович киләчәктә чакыру буенча планны үтәргә, бу эшкә авыл биләмәләре башлыкларын, җәмәгатьчелекне җәлеп итәргә кушты.

Сезгә ошарга мөмкин...

Комментарий өстәргә

Ваш e-mail не будет опубликован. Обязательные поля помечены *